MMX (II)

2010@國際大事 (II)

都話會有野遺漏架啦, 寫返先...

昂山素姬獲釋：被緬甸政府軟禁多年之後終於獲釋, 但仍然睇唔到係民主既勝利. 爭取民主有咩錯？點解要受到咁樣對待？民主o係好多地方都唔係與生俱來, 係靠住某d人無私既犧牲造就出來既. 劉曉波如是, 昂山素姬如是, 仲有千千萬萬個無名無姓的人.

外交九一一：維基解密網站陸續爆出美國大量外交機密文件, 撇除洩密所造成的安全和面子問題, 其實有d內容都幾好笑. 例如話普京係蝙蝠俠, 梅德韋傑夫係小丑. 哈哈, 原來外交人員都幾有幽默感同想像力架 bor, 唔係平時傳媒portray 出來咁嚴肅.
 

世界盃 related：2010年世界盃曲終人散, 強如意大利法國在首圈出局, 英格蘭的表現仍然令人失望(Lampard球波再次挑起goalline technology的爭議), 西班牙歷史性奪標, 仲有唔好唔記得人氣熱爆既南非特產 "魔鬼喇叭". 俄羅斯卡塔爾獲得2018同2022年世界盃的主辦權. 唔係睇少呢兩個國家, 不過覺得成個甄選過程過於兒戲, 希望最後唔好搞到一鑊泡.
 

智利33名礦工被困69日重出生天：唔係成日要挖苦祖國. 只係當你睇到呢d新聞, 你會諗每年內地死於礦難的礦工何其多, 可以話係無日無之, 差在多定少, 或者佢報唔報出黎. 再加上內地同胞為賺錢不擇手段, 乜都要快, 唔理安全, 礦工命賤, 為兩餐, 送死去了. 我記得幾年前係澳洲個陣都有類似事件, 人地都可以挖通道送食物, 同被困的人通訊, 監察住礦井內的情況, 最後全部5人安全獲救. 我相信內地絕對有條件做同樣的事, 只係是不為也, 非不能也.

天災：海地、青海大地震、冰島火山爆發、巴基斯坦水災...

MMX

2010 @ 家庭

唔知由幾時開始, 我已經有好多事唔會同屋企講. 可能係覺得講左冇幫助, 或者大家想法唔同無謂爭拗, 或者有其他種種原因(我都唔知), 好多野都係自己收收埋埋, 係個腦入面諗完又諗, 然後個腦開始負荷太大, 然後會自己shut down唔諗, 但得閒無事又會拿出來分析下又掉返入腦. 哈. 我唔可以話今年同屋企既關係疏左, 同屋企人相處既時間同以往差唔多, 對家人既關心應冇少到, 只係有咩事我會選擇自己面對/解決/同朋友傾訴, 而呢種做法某程度上令我有點罪疚感, 但我又覺得冇必要改變呢種做法. 噢, 真係矛盾.

樂樂三月做左第一次手術(做左7個鐘!!!). Thank God! 傷口癒合得很好. 睇住小朋友一日一日長大, 原來真係好開心(雖然我唔係父母). 做小朋友真係好, 冇煩惱, 唔洗諗咁多野, 有人錫, 一舉手一投足都tum到人鬼咁開心.

2010 @ 工作

好似冇咩轉變. 雖然繼續係咁呻, 但仍然繼續係咁做(做到隻狗咁). 唔知可以點. 除非有一日鼓起勇氣不顧後果辭職唔撈, 如果唔係真係唔知點樣可以來個change. 六月來了新同事, 老土都要講句: 失去左先學懂珍惜. 真係一山還有一山低, 經典絕無冷場: 例如一星期請三次medical而每次事前絕口不提(即係到個日朝早都冇提過,只係lunch過左好耐都唔見人我(地)(我估老細事先都唔知…)先估佢應該係請medical, 然後大模施樣4點零返公司, 然後再大模施樣5點鐘走人). 我真係接受唔到囉!!! 我唔明點解老細放大假,我既工作量係佢既三倍(但人工又唔見係三倍).又例如d人會對住電話大聲同人嗌交(即係會講埋d「我想兜巴星你呀」etc.), 而無視全公司人既存在. 仲有那首震耳欲聾的「波兒」鈴聲, 每次鈴聲「劃破」office的寂靜我都會彈起(+想爆粗), 我真係唔明點解唔可以用震機!!!

請教我點樣同有關人士相處/合作? 我發覺對佢不瞅不睬(意思係佢同我講野我會回應, 但我唔會主動同佢講野[工作上需要除外] )已經係我對佢最大既容忍. 上司無能管理下屬, 下屬恣意放肆+挑戰上司底線, 我的工作環境實令人羨慕不已!!!

2010 @ 旅遊

去左2次旅行, 一短一長.

四天曼谷係for take a break from work. 自從09年10月去左三日上海睇網球之後, 都未出過國. 曼谷/泰國是一個不錯的地方, 價廉物美, 有機會應再去.

北歐/Baltics之旅很難忘, 發生很多事, 見返很多朋友. 可以暫時忘卻工作20日真爽.

2010 @ 國際大事

(一時間淨係諗起呢d, 可能有遺漏…)

當然, 首推菲律賓人質事件: 雖然又唔算國際大事. 國際媒體對呢件事既報道唔係好多, 不過因為呢件事關係到香港, 又睇住事件既現場直播, 印象先特別深刻同震撼. 亦因為呢件事令我對菲律賓這個國家有更進一步的認識 (不過係壞方面).

劉曉波獲頒諾貝爾和平獎: 第一次聽到呢個消息身在芬蘭赫爾辛基, 很佩服挪威諾委會既“吉士”, 而事件再次顯出中國的小家(和低能).

提到劉曉波又不得不提趙連海,目撃到一名蟻民(sorry,容許我用呢個term)面對大政府的「大無畏」、據理力爭、無悔(光榮)入獄(+贏得掌聲/同情)、(被大政府壓搾威迫)[<--都應該有]、屈服、摺埋、不了了之(+省略號). 何其悲哀!

南北韓瀕臨開戰邊緣: 人總是希望世界和平, 唔想聽到打仗的消息/新聞. 不過前幾天有朋友話如果南北韓真係打仗, 對北韓人民可能是一個解放既機會.如果真係咁, 代價會唔會太大？係咪一定要有人命傷亡, 先可以有自由/和平？

歐洲大風雪令Heathrow癱瘓, 大批旅客滯留: 最搞笑係有人提出要香港政府包機接滯留的人回港. 好似繼曼谷暴動同馬尼拉事件之後, 香港人都以為出句聲就可以包機, 你估真係咁易呀? OK, 錢都係其次, 問題係宜家唔係冇機, 係機場因積雪關閉左條跑條, 唔准飛機升降呀. 航空公司自己都想疏散乘客啦, 你估佢地見到咁多人又會好心涼咩? 幫你安排接駁巴士去另一個機場, 再安排埋機位俾你都算仁至義盡啦. 那些(有錢的)留學生和家長, 請不要再提出無理的要求. 唔好再埋怨政府/航空公司冇幫你地, 因為佢地都愛莫能助. 同學請學識自立, 臨陣應變突發情況, 唔好少少事就大驚小怪; 家長請放手讓孩子成長, 你可以擔心, 但不要無理取鬧. 唔係有錢都所有事都理所當然的.

2010@婚嫁

很多舊同學/朋友都在今年結婚了, 主要集中在下半年. 但又得知有舊同學(好似)離婚了, 覺得呢個世界真係「化學」.當初結婚時大家都甜甜蜜蜜, 點解過左若干日子(長短不等)之後會變成另一個極端？很可怕... 唔鍾意聽到呢d 消息, 尤其是目睹咁多pair 同學/朋友簽紙結婚, 感受到當中的喜悅和承諾之後, 更加難想像點解呢個世界會有人離婚, 係人變左, 定係環境/關係轉變造成?